أيها الساده والسيئات
جاءنا البيان التالي
نجحت قواتنا المشرشحه صباح اليوم وفي تمام الساعه " اتنين اتنين ونص كده " في عبور قناة ميلودي
واقتحام خط موبينيل والسيطره علي مدونة بت خيخه واي كلام
وقد تمكنت طائراتنا من فك حصون العتو والسيطرة علي جميع نقاطه الحزينه
كان هذا هو الموجز واليكم الانباء بالتفصيل بعد سماع هذا الاعلال
اعلان
نفسك تبقي حرامي نفسك تبقي حراميه اتصل بيه علي رقم
زيرو تسعميه زيرو تسع تسعات وكل ماتسعاتك تكتر كل ما فرصتك في الفوز تتخن
اتصل بيه دي فرصه خشبيه يالا مستني مييييين
***************************
التفاصيل
نجحت اليوم (بتقدير مقبول وبالعافيه ) قواتنا المريحه بالسيطره علي مدونة البت الخيخه لمده طويله ومن تم سرقت اشياء تخينه
وقد وافانا مراسلنا من قلب الحدث (ابو سنوفة ) بهذا التقرير
التقرير
في غضون الساعه الثانيه بعد المغر ب مباشرة اغلقت البت الخيخه مدونتها وخرجت بدري فاستغل الحرامي فرصة تواجدها خارج المدونه وقام بضرب المدونه بالطيران
مما ادي الي احداث كسر في شباك المطبخ والذي تسلل منه الحرامي وقام بالعمليه واليكم هذه المعلومات عن الضحيه
***********************************
بت خيخة وأي كلام
العمر: 31
الجنس: انثى
علامة تنجيمية: برج الجدي
دائرة الأبراج: عام الثعبان
الصناعة: اتصالات أو وسائل إعلام
المكان: محافظة اكتوبر اللعينة : حاصلة على بكالريوس اعلام قسم رئيسى صحافة وقسم فرعى علاقات عامة : مصر
من أنا
ونفس وماسواها@فألهمها فجورها وتقواها @قد افلح من زكاها @ وقد خاب من دساها
الاهتمامات
الأفلام المفضلة
ghandy frinch kiss
الموسيقى المفضلة
الموسيقى المفضلة
كان معكم ابو سنوفة من داخل مدونة البت خيخه
****************************************************************************وعلي صعيد اخرقدرت المسروقات بنحو نصف مليون دولارمصري وهذا حصريا انفراد بنشر المسروقات
*********************************************************************
دنيا ...واخره
الدنيا ماشية معاها بالعكس
لما تحب تخس ... تتخن
ولما تتطمع فى ترقية ... تترفت من شغلها
ولما تنوى تشترى جزمة بيضاعلى السودا الوحيدة اللى تملكها
السودا تتقطع وتضطر انها تشترى سودا تانية
ولما تبقى زوجة .... تترمل
ولما تعرف إنها حامل .... تجهض
حتى اليوم اللى درجة الحرارةوصلت فيه لواحد واربعين
و اتمنت انها تشرب فيه شوب عصير قصب
افتكرت فجأة والكوباية على شفايفها
اان النهاردة الإتنين وانها بتصوم اتنين وخميس
هى خلاص خدت على انها متتمناش أى شئ
لانها حفظت النتيجة عن ظهر قلب
وتقبلتها عن طيب خاطروإيمان قوى بربنا
وأنه سبحانه وتعالى أكيد شايلها حاجة أحسن
لكن جه يوم الدنيا مشيت معاها زى ما هى عايزة
كانت بتدور على شغل والغريب انها لاقت شغل
نزلت تشترى فستان جديد
والغريب انها اشترته بدون أى اعتراض من الدنيا
ولما حبت تشرب عصير قصب ... إستمتعت بيه
لأن النهاردة كان يوم أربع وماكنتش صايمة
دخلت بيتها لاقت نفسها نايمة ووشها متغطى
ومامتها قاعدة على يمينها
وأختها قاعدة قدام السرير
وخالتها قاعدة على شمالها
وكلهم بيعيطوا وبيقروا قرأن
بصت فى المراية ماشفتش نفسها
ساعتها إتأكدت إن الدنيا ماشية معاها بالعكس
واليوم اللى إعتقدت فيه
إن الدنيا مشيت معاها زى ما هى عايزة
عرفت إنها الأخرة
إنتهى
بت خيخة وأي كلام
قال الله تعالى فى كتابه الحكيم
فى سورة الأعلى
بسم الله الرحمن الرحيم
"والآخرة خير وأبقى"
صدق الله العظيم
وفى سورة النساء
بسم الله الرحمن الرحيم
"متاع الدنيا قليل والأخرة خير لمن اتقى"
صدق الله العظيم
********************************
ومن ناحية اخري اعلن متحدث باسم الناحيه الشنبيه لتحريك الودان عن مسؤلتها عن العمليه ( مع ان انا اللي سرقتها والله العظيم )
**********************
ملحوظه هاااامه
البت الخيخه دي عندها بوستات جامده جداااا انا بصراحه كان نفسي اسرقهم كلهم لكن اخترت البوست دا لتلت اسباب
اولا
ان البوست قصير نسبيا ودا لاني بعقم وبعمل الحبتين بتوعي ولو اخترت حاجه اكبركان ممكن تتخضوا من البوست
ثانيا
االبوست دا اثر فيا جدااا وحسيت بمعناه كويس واكيد هتحسو باللي هيه عايزه تقوله
ثالثا
لا مفيش حاجه ( علي رأي خيخه )
أولا مبروك يا استاذ حرامى على السريقة الجديدة الجامدة دى
ردحذفيااااااه نص مليون دولار مصرى .. دول يطلعوا كام جنيه بورسعيدى دول لو سمحت؟؟
ثانيا أهنيك على سرقة خيخة .. مدونة خيخة الجامدة جدا.. مش بقولك إنت داخل على التقيل عدل.. بجد البوست جميل جدا .. والتعقيم بتاعك جامد جدا
ثالثا فين التعليقات؟؟ إنت مش بتشوف أحسن تعليق جه رد على البوست وبتنشره مع البوست؟؟
رابعا أنا عمالة اتصل من ساعتها على الرقم اللى انت حاطة .. وكل مرة تطلع واحدة تقولى الهاتف الذى طلبته ربما يكون مسروقا .. حتى الخط مرحمتوش يا مفترى
يالا ربنا يوفقك .. أو يوفقنا نقفشك
ايه يا راجل انت ده
ردحذفمين ده اللى اثر فيك
وانت بيأثر فيك حاجة
انت هتمثل يا جدع انت
طبعا البوست رائع رائع
ومدونة بت خيخة من افضل المدونات اللى بقرالها
وبرغم انى مش بعلق عندها ومعرفش ليه
الا اني مبسبش بوست الا لما اقراه ليها
هي فعلا حد كويس جدا
ربنا يصبرها علي وفاه والدها
ويرحمها من تحت ايدك يا لص انت
ياللى منك لله
وايه الجدع ابو سنوفة ده اللى طلعلنا في المقدر
ده هم ايه ده
بس موضوع هايل جدا وجميل بجد
ردحذفبيعجبني زوقك يا حرامي
لا انت حرامي محترف بجد
تحياتي
ربنا يرجعها يالسلامه
ردحذفوينولها اللى هى بتتمناه لابنها
إختيار موفق وفى محله لأنها مدونة جميلة فعلاً
ردحذفأنا برضة بتعجبنى وبأتابعها وضايفاها عندى بس مابأعلقش عندها وماتسألنيش ليه
دمت بكل الود
وربنا يعينكم فى العمليات القادمة
الف مبروك على نجاح العمليه
ردحذفوبجد شكلها مدونه جامده جدا
البوست رائع جدا واحساسه عالى وكلاماته
بجد اخدنى جدا
شكرا انك عرفتنا بالمدونه الثمينه دى
اروح اقرا فيها بقى:)
فعلاً اختيار رائع .. تستحق السرقة
ردحذفتحياتى .. مع اتمنى بسرقة مواقفة المرة القادمة .
نفرتارى
أزال المؤلف هذا التعليق.
ردحذفمدونة غريبة جدااا
ردحذفبس فعلا حرامى محترم و عنده ذوق
اختيارك للبوست ده فعلا جامد
تحياتى
يا عينى يا خيخه
ردحذفربنا يعينك يابنتى
مش تخلى بالك من الحرامى
اهو قبض عليكى نعمل ايه احنا دلوقتى
يادوبك الحق ابلغ النجدة
يا مسهل
smilyrose
روح الحب الصادق
الحمد لله انك وصلت بالسلامة يا حرامى
ردحذففعلا مدونة بت خيخة من اجمل المدونات اللى باتبعها
هى زى العسل
تعيش وتسرق
ايه ده ايه ده
ردحذفيامى يامى يامى
ربنا يستر
المره دى قبضت على خيخه يا ترى المره الجايه هتقبض على مين
وبعدين المفروض احنا نقبض عليك اصلا
بس بجد مدونتك لذيذه واسلوبك جميل ومرح
تحياتى ليك
السلام عليكم
ردحذفإمسك حراااامى .... إمسك حراااامى
شرفتنى يا حرامى بزيارتك وتعليقك المتميز
والله إنت ظريف ومدونتك ظريفة يا حرامى
وهبلغ عنك المباحث
تحياتى
ويسشعدنى التواصل معك
ههههههههههههههههههههههههه بجد دلت مدونات كتير جداااا اول مرة اشوف كدة انا استغربت الاسم فى الاول دخلت ملف التعريف قعدت اضحك دخلت المدونة فطست على روحى من الضحك
ردحذفبجد حتى البوست اللى سرقتوه فعلا جميل عايزاكم تسرقوا اكتر
تحياتى
ايمى
طيب انا عندي استفسار
ردحذفمممكن اعرف
متى بتعرض المدونه في السوق السودا للبيع؟
الحرامى
ردحذفالسلام عليكم ورحمة الله وبركاته
يا سارق من عينى النوم ، انت ذكر ام انثي ، وانا توهت فى مدونتك ظلمة والالوان كتير ونظرى ضعيف ومش عارف مين البت الخيخة اللى الدنيا ماشية معاها بالورب
المهم دمك خفيف ذكر او انثى وشكرا على الزيارة والتعليق
لك تحياتى والسلام عليكم ، ولا سلام مع اليهود
بصراحة البت خيخة
ردحذفكانت مستخخيخة قوي في المدونة بتاعتها
لدرجة انك وانت ماشي لازم تطلع بحاجة في جيبك وانت ماشي
سواء رضيت او لم ترضى
ربنا يعينك يا استاذ حرامي
على فكرة انا قلت لاصحابي المدونين عليك
علشان يبقوا يسيبوا الباب موارب شوية
يعني مساعدة
تحياتي ليك
:)................وفقكم الله واعانكم على فعل
ردحذف(الشر).......:).....سندس
اولا بعد ما قريت المنشور فى الصحف عن سرقة البنت الخيخه واى كلام .. قررت ان اخلع جميع ملابسى فقط لبست الاندر وير وجيت عشان اشوف ايه الموضوع .. يعنى مش حتعرف تسرق منى اى حاجه .. واحذرك انى بلغت جميع شرطة الحراسات لحراسة المدونه من السرقه او السطو المسلح كما اخطرت الانتربول الدولى وكمان استأجرت كذا حرامى عشان يدلونى على السارق لو حصل حاجه
ردحذفوعملت كاميرا مراقبه وحاجات كتير جدا .. احذرك من السطو على المدونه .. الدواء فيه سم قاتل
تحياتى
ههههههههههههههههه
ردحذفبجد فكرة المدونة جاااامده جدااا
عجبتنى جداااااا
و طريقتك جميلة بجد
الله ينور
يوه ده انا اتأخرت اوي يادي الكسوف
ردحذفالمهم عايزه اقولك بجد اختيار موفق جدا جدا
بوست تحفه ومؤثر جدا وصحبته اختراته صح بنت خيخيه خيخه يعني بس مش اي كلام عسوله وكلمها صح مليون الميه والله جه في وقته فعلا سبحان الله محدش هيرتاح يابني في الدنيا دي الراحه في الدار الاخره بس ربنا يجعل اخرتنا كويسه وطاعه
والله فكره المدونه اكثر من رائعه اهو انا بقي نفسي اعرف الحرامي ده ميييييين متقول بقي ياعم الحج مدوخناش عموما سواء عرفناك او معرفنكش فانت شخصيه جميله وزي العسل ومبسوطين بيك كده وانت زي اللهو الخفي حرامي بقي لازم تتخفي
تحياتي خالص موت يعني
والله فى تقدم اهو ...وصلت لسرقة البت خيخه...
ردحذفاما نشوف اخرة السرقه الاورديحى دى ايه؟؟؟؟
ياعم اسرق حاجه تجيبلك فلوووس...
يعنى اسرق ...وساوم اللى سرقته ...وقوله انا معايا البوست بتاعك تدفع ولا نذيع؟؟؟؟
هو ده الشغل ....لالالالالالا....انت عضمك طرى...
لسه بدرى عليك....
تحياتى
كيف حالك ايها الحرامى السوسه
ردحذفتعرف انا دخلت عندك قبل كده وقلت بصراحه تسلم الدماغ بجد الفكره هايله لكن انا عادتى مش بعلق كتير
بنت خيخه انا عارفاها بس عمرى مش دخلت مدونتها خالص
البوست بجد معناه حلو وتعرف خلانى اقول الحمد لله على اى حال
انا مبسوطه ان مدنتى بتعجبك حتى لو كنت بتقر عليا ومبسوطه انك قررت تسرأقنى
وايه رأيك فى عرض انى ابقى دراعك اليمين مكان أبو سنوفه؟ :)
maiosha
ردحذفالله يبارك فيكي يا باشا
والنص مليون دولار ييجو حوالي خمسميت ألف لحلوح فيومي
ثانيا موضوع التعليقات ده بس عشان الناس اشتكت من طول البوستفقلت اقصره قدر الامكان بس اوعدك ان المرادي التعليقات موجوده انا معنديش ياما ارحميني
عاشرا
بسيطه سيبيلي رقم تليفونك وانا هتصل عليكي
بس تشحنيلي كرت يا ماما هوانا هصرف عليكوا ولا ايه
maha zein
ردحذفايه يا حجه انت يا حجه
انا ايه
مش بتأثر ازااي
دانا حرامي محترم
وبعدين مش بتعلقي هناك ليه
مع ان انا بس اللي اعلق اجدعها حاجه ف غمضة عين
وبعدين انت مالك ومال ابو سنوفه
نقرك من نقرها ليه
هي عملتلك حاجه
دا حتي بت طيبه
وسفيفه كده
مذكرات مشاغب
ردحذفمع انك الوحيد اللي سرقتني
وانا ما اتسرقش ابدا
- حنفي
خلاص اتسرق المرادي
الا اني مبسوط انك شرفتني
بيس يا ماااااااان
dodda
ردحذفايه داااااااااااااااااه
هي صعبت عليكي
لا مهو انا ما يهمنيش
اينعم ربنا يخليلها شريف
بس هسرقها
صدي الصمت
ردحذفمش هسألك ليه ما بتعلقيش عندها
انت ازاااااااااي ما بتعلق عندها
dina
ردحذفالمدونه فعلا روعه
يالا اقري ولو لقيتي حاجه ابقي اسرقيها واديهالي انشرها
نفرتاري
ردحذفمشكووووووووووووووووووور
فعلا المدونه جامده يا جماعه
شوفوها
ايه داااه انا وصلت للفراعنه
يا فرحة امك بيك يا واد يا حرااامي
خيخاااااااااااااااااه
ردحذفتعظيم سلاااااااااااام
المدونه فعلا روعه وانا انبهرت بيها
وكنت محتار اسرق ايه ولا ايه
انت فعلا كل كتاباتك جميله
هو انت ما جبتيش شريف معاكي ليه
كنت هتفرجيه علي عمو الحراااامي
وانا مبسوط انك عايزه تتسرقي علي طول
وان فكرة المدونه عجبتك
انا عندي مدونه تانيه بكتب فيها
بس محدش يعرفها
حتي انا ساعة باجي هنا معرفهاش
عايز الناس تكشفني
عايز اتوب يا جدعااااان
قوس قزح
ردحذفهو ايه اللي غريب يا عم الحج
انا غريب
اشتم اشتم علموك ف بلدك كده
smilyrose
ردحذفتبلغي مين
ولا بيهمني
مش النجده دي اللي هي المطافي ولا انت تقصدي
اللهم احفظنا
اميرة الجنه
ردحذفايه الكروته دي
البت خيخه فعلا جامده
نورتيني
عزيزي الحرامي
ردحذفلن اطلب منك ان تتجنب سرقتي
فانا مطمئن لكفائة اجهزة الانزار المبكر التي استخدمها
ههههههههههههه
لكن ساطلب منك الاستمرار في السرقة
تحياتي لاسلوبك اللصوصي الجميل
فكرتني بربون هوود وارسين لوبين
تحياتي
تامر الحسيني
انسان عاشق حر
ريمان
ردحذفقبضت علي مين
هي خيخه اينعم
بس محدش يقدر يقبض عليها
دي تقبض علي بلد
نورتيني
اللؤلؤة
ردحذفايه التناقض ده
ازاي شرفتك وانت هتبلغي عني
عموما ولا بيهمني
انا اساسا لما مش بلاقي حد بيبلغ عني
بسلم نفسي علي طوووول
EMMY BABY
ردحذفشرفتيني
ويارب ما تكونش اخر زياره
ايه خايفه تتسرقي
لا ما تخافيش
زورتيني ما زورتينيش هتتسرقس
فاحسنلك تيجي
اقصوصه
ردحذفالسوق مين
لا احنا ما بنبيعيش في السوق السودا
احنا ممكن نشتري منها
هو انا من ساعة ما فتحت المحل دا ( قصدي المدونه ) حد عبرني ولا اشتري حاجه
Beram ElMasry
ردحذفعم بيرم
شرفتني
وانا ذكر بس دراعي اليمين ابو سنوفه انثي بس بميت راجل
لا سلام مع اليهود
Tshandny
ردحذفاه والله انا لقيتها مستخيخه فيها قلت والله لاسرقها
اصلها بصراحه تستحق السرقه
وبعدين
متشكرين عالمساعده يا معلم
بس ما يهمكش حتي لو قفلو الباب
انا بعرف اسلك كويس
سندس وأمل
ردحذفهههههههههههههه
شر
الشربره وبعيد
fashkool
ردحذفعم فشكوووول
مهما عملت احب اقولك هتتسرق هتتسرق
وبعدين الحراميه اللي انت مأجرهم دول تبعي يا معلم
ولا بيهمني من الحراسات الخاصه ولا
هما مين النتر ..........معرفش ايه دا
لا انت شكلك حرامى كويس
ردحذفبتقع على غنيمة كويسة
لكن لو عايز تتعلم السرقة على اصولها
تعالى عندى
واطلب العفو من شيخ حرامية الحارة
مواطن مصرى نايم
ردحذفشكرا ياباشا
بس تعليق هنا عباره عن تصريح رسمي بالسرقه
حرص يعني
سمكه واحده
ردحذفدايما تيجي متأخره كده
مخصوم منك 3 سنين
ايه تتأثري دي
اقصر من كده
مش عارف ليه حاسس انك قصيره
هههههههه
لا مش هقول انا مين
انت عايزه تبلغي عني
وتقفليلي المحل اللي بناكل منه لقمة عيش
بنت الغربة
ردحذفايه دا بقي دا بقي دابقي ده
انت بتحرضيني
طاب انا اول حد هعمل معاه كد هيبقي انت
ايه اخبار الباشا
لو مزعلك
اسرقهولك
Habiba
ردحذفنااااعااااااااام
مبتعلقيش كتير
لا يا ماما
انت تيجي هنا وتعلقي غصب عنك
انا بهددك اهو
ان ما علقتيش هسرقك
وممكن اخطفك كمان
وقد اعجر من بعجر
Tamer Alhosiny
ردحذفايه
اجهزة ايه
شكلك ما تعرفنيش
احنا مش بيفرق معانا يا معلم
الا هما مين الزملا اللي انا بفكرك بيهم دول شغالين ف انهي منطقه
عشان منقطعش علي بعض
الازهرى
ردحذفانت وقعت يا معلم
ولا حدش سمي عليك
انا جاي عندك
استلقي وعدك بقي